Ma gh’hemm de bon besogn de l’italian (e di tucc i lengov maggioritari)

L’è ‘na resposta tipega ai noster domand de protezion di noster lengov che di lengov important comé l’italian gh’hemm besogn. Anca l’Accademia de la Lengua italiana, in d’una lettera indova, cont di argoment de l’era fassista e voramai superad de la lenguistega moderna, la dis che la lengua lombarda la esist minga (Se la esist no sont dree a domandàmm comé foo a scriv a vialter, ma hinn di dettaj) la sottaligna che poeudom no avè un futur indova che se parlen domà Lombard e Ingles.

Inveci, se pò. Forsi saroo un poo radical in ‘sto articol chì, ma de facc l’è proppi la situazion de imposizion lenguistega italiana a vess ‘na mincionada che la merita ‘sto trattament fort.

Comè avevi sgiamò scricc in del mè vegg articol el Lombard l’è pussee vesin ai lengov de l’Europa importanta come ‘l Franzes, el Spagnoeul, el Catalan che l’Italian, e donca l’è pussee util e “spendibel”, ‘me se dis chichinscì in Italia. E donca, se proppi gh’hemm de scernì in tra un monolenguism l’è mej quell cont el Lombard.

Ma chi riven i grand e important reson di monolenguista: L’italian l’è prestigios per la musega lirica. Soo mia vialter, ma mi voo no a crompàm de magnà in falsett, preferissi avègh ‘na lengua pussee internazionala.

E chi scominci el descor: I lengov maggioritari hinn no fondamentai, e poeudom viv anca senza. In Lombard, comé in Catalan, in Basch e in Sicilian poeudom parlà de tutt e tucc: Gh’hemm i paroll per el settor tecnegh, per la medesina, ma anca per rid e scherzà. Poeudom anca insegnà a scoeula con ‘sti lengov chi: Per esempi el model de immersion catalana l’è bon de insegnà ben dò lengov ai student e de fàj rivà in alt in di classifegh de l savè de l’Ingles. Pensà che ghe sien di lengov che hinn mia bon per viv l’è ‘n error, ‘n ideja veggia e elitarista, che la vegn di temp indova gh’era ‘na lengua colta di elite e ‘na lengua considerada sgresgia di sgent. E di voeult, del 2017, i lengov del Popol hinn pussee util e produttiv di quell che l’elite del 1800 l’ha scernud ‘me lengua bella.

Ciarament se la Lombardia l’è in del Stat italian poeudi anca capì ‘na presenza del Toscan, lengua scernuda del Stat ‘me offizial, ma semper fiancad a la lengua che l’è propria de la Lombardia da circa 1000 agn: El Lombard.
Scassàl l’è domà ‘n ideja per gent povera de idej che la voeur sveninàss pussee che la pò a d’un elite voramai morta ma a nivell de idej ben presenta per desmentegà el futur, ben vesin, de bilenguism.

Lascia un commento

Il tuo indirizzo email non sarà pubblicato. I campi obbligatori sono contrassegnati *